تجربتي مع الآيلتس
د. أحمد سمير اسكور 8

أخيرا عديت الايلتس الحمد لله وإليكم  قصتي باختصار:

بالنسبة لمستوايا المبدئي فكان متوسط يعني يدوبك يؤهلني أني أفهم بصعوبة المعني العام للمقالات الانجليزية رغم أن في كلمات كتير مكنتش بفهمها … ممكن أتكلم انجليزي بس كلمة كلمة كدة و كأني
بستهجي و طبعا كلام بسيط جدا .. كنت أسمع نشرات الانجليزي تقريبا مفهمش 90% من الكلام .. يدوبك كلمتين في النص كدة و خلاص.. باختصار مستوي متوسط أو يمكن أقل من المتوسط .. دخلت الايلتس 5 مرات

 

5/2017 :   L7.5  R7   S7     W6.5

7/2017  :  L8    R 8   S6     W6.5

10/2017 :  L8.5  R9  S6.5   W7  

6/2018 :    L7    R9  S6.5    W6.5

9/2018 : L8.5  R8.5 S7.5 W7

 

حتكلم عن قسم قسم بأختصار:

قسم الاستماع

في الأول كنت فاكره أصعب حاجة لكن اتضح أنه فعلا أسهل قسم فيهم بعد ال Reading  مشكلتي الوحيده معاه أني بسرح في نص الامتحان و دي حصلت للاسف في مرتين من ال ٥ محاولات اللي فوق ..

في الأول لما بدأت أفتح امتحانات كامبريدج لقيت كلامهم مفهوم الي حد ما بس سريع جداااا .. المهم بدأت أحل امتحانات بعد ما شوفت بعض فيديوهات في موقعEngvid     عن كيفية التعامل في الليسننج .. بدأت من ٤ لحد ما وصلت خلال 5 شهور حل امتحانات ليسننج يومي  أني أجيب ال 8 ..

و نصيحتي في الجزء دة الممارسة أهم شيء .. حل كتير و اغلط كتير بس لازم تراجع غلطاتك لحد ما توصل أنك بتحل عشان تدور ع التركة اللي في كل سؤال ..

في نقطة تانية أعتقد ساعدتني كتير بس حذكرها في جزء السبيكنج و هي  فكرة  Listen and repeat ..

و كمان حاول تشوف نقط ضعفك فين و تحلها .. يعني لو مشكلتك في سماع الأرقام زي أرقام التليفونات مثلا : ركز ع النقطة دي و خلي حد يمليك أرقام كتير .. لو مشكلتك في تملية الحروف خاصة بعض الحروف المتشابهة النطق زي ال a/e  p/b  g/j  ركز عليها و دور ع فيديوهات ع اليوتيوب تعالج النقطة دي بالذات و اعمل تدريب مكثف عليها لحد ما تظبطها أو ممكن تاخد كورس مع حد يظبطهالك .. أفتكر د.محمد خليل موسي اللي أنا خدت معاه كورس قبل اخر امتحان اده محاضرة مخصوص في التركات دي  ..

طب دلوقتي أحل منين ؟

Cambridge books

ieltsonlinetests    موقع

و لو خلصتهم فيه بعض القنوات ع اليوتيوب بتنشر فيديوهات ليسننج كل يوم بس خليها أخر خيار لأن كتير منها بيكون قديم و غير مطابق للإمتحان الحقيقي .. 

 نقطة كمان عايز أوضحها : حاول و أنت بتحل تشغل الصوت عالي في السماعة و تقول وراه بصوت واطي دة حيساعدك أنك متتشتتش و تسرح و في نفس الوقت حيساعدك لغويا جدااا في تنمية مهارات الليسننج و السبيكنج ..

أخر نقطة : لو أنت من هواة السوشيال ميديا زي حالاتي فبدل ما هي مضيعة للوقت استغلها عشان يزودك لغة .. أنا خليت اليوتيوب و الفيس بتاعي كله تقريبا انجليزي و  و بقيت بقعد أسمع انجليزي بالساعاااات كل يوم .. اسمع كل حاجة في كل الموضوعااااااات لحد ما توصل أنك بقيت تكلم نفسك بالانجليزي فقط و طبعا لازم تخصص ع الأقل ساعة كل يوم تسمع أخبار من أي مصدر يعجبك أنا كنت بسمع في الأول للجزيرة انجليش لأني بحس أن أخبارها أقرب لاهتماماتي بأخبار المنطقة العربية  من القنوات الأجنبية و بعدين بدات أشكل شوية  BBC ..  و شوية CNN  و بعدين لقيت CBC  الكندية اللي ليهم نشرة كل يوم بينزلوها بالsubtitles  و دي بقي أحلي حاجة لأن لو معرفتش تسمع حاجة ممكن تقراها و تعرف معناها .. مشكلتهم أنهم حتلاقيهم بيتكلموا كتير علي دعم الشواذ و تقنين الحشيش .. عدي الحاجات دي و متضيعش وقتك فيها ..

المحادثة

أول ما بدأت  speaking بدأت تقريبا أسمع شوية فيديوهات من موقع Engvid   فقط شوية معلومات أولية عن الامتحان .. و بعدين من الجروب هنا لقيت ناس منزلين كتاب ielts journal for speaking   و دة كتاب راااااائع جدا حنصح بيه في السبيكنج و ممكن تحمله من موقع book4joy.blogspot…  حيديك فكرة شاملة عن ازاي تتعامل و اقرا كتير أوي الModal answers   اللي فيه .. حنيجي بقي للممارسة اللي هي أهم حاجة في الجزء دة .. ما سأنصح بيه مبدأيا مش أنك تتدرب مع حد و لا أنك تجرب أسئلة و تجاوب من نفسك لأ .. لأن في الأغلب لو مستواك ضعيف حتلاقي الموضوع صعب و كريه و مش حتكمل .. الحل السحري للموضوع هو فكرة Listen and repeat ..  يعني  أنك تشوف فيديوهات انجليش بالsubtitles  و تبدأ تتفرج بس طبعا مش تتفرج و خلاص لأ .. تشغل جملة جملة و تعمل pause بعد كل جملة و تكررها مرة و اتنين و تلاتة  لحد ما تنطقها زيهم بالضبط  ثم تشغل الجملة اللي بعدها و هكذا …. طب أنهو فيديوهات تنفع أطبق عليها الموضوع دة؟  أقترح Comedy English series   لأنها شيقة جدا و عامة عندك تشكيلة كاملة من الأفلام و المسلسلات بال subtitles ع الموقع دة .. شوف اللي أنت تحبه و ابدأ   bmovies.stream

المهم أنك تختار حاجة تحبها لأن الموضوع دة بياخد وقت كبير .. أنا كنت باخد حلقة المسلسل اللي هي تلت ساعة ألاقيها تاخد معايا بالطريقة دي ساعة و نص مثلا و طبعا لو لقيت كلمات غريب بص ع معناها و ياريت لو تكتبها هي في وسط جملتها في كراسة منفصلة ..

بعد شهر أو شهرين مثلا حتلاقي لسانك بدأ ينطلق .. ساعتها ابدأ بقي ممارسة  و عندك موقع ielts-blog.net    دة أفضل مصدر لامتحانات ال speaking  السابقة ..

و أيضا أرشحلك ielts speaking assisstant  و دة موبايل ابليكيشن فيه أسئلة باجاباتها النموذجية بالصوت .. للأسف هو مش مجاني بس ممتاز الصراحة خاصة للي بيتمشي كتير ما بين الشغل و البيت زي حالاتي .. خلي البرنامج دة التسلية بتاعتك طول ما أنت ماشي في أي حتة .. تسمع السؤال و تحاول تجاوب بنفسك ثم تسمع الاجابة النموذجية و ترددها أكتر من مرة .. بس متحفظهاش .. رددها كتير بس و خلاص .. حتلاقي نفسك بعد كدة بتلقط منها الأسلوب و الكلمات و الأفكار و هو دة المطلوب ..

أخيرا و دة مهم جدا .. أنا شايف أن جزء السبيكنج لازم تحضر معاه كورس مع حد فاهم  ايلتس عشان يقولك مشاكلك فين .. أنا مثلا كنت بركز لحد ما قبل الامتحان الأخير في فكرة ال fluency  فقط و دة عمره ما كان كفاية   ..

أنا خدت كورسات مع مين :

مبدأيا أنا حاولت استخدم تطبيقات التواصل المجانية مع natives  و كدة بس لقيتها فكرة فاشلة و تضييع وقت الصراحة .. فحجزت مع موقع cambly    و مواقع اخري عشان أمارس اللغة و بشكل عام المواقع دي مش وحشة بشرط أنك تقدر تختار ناس فاهمة ايلتس و عارفة التكنيكس بتاعته مش مجرد واحد مش لاقي شغلانة فعمل فيها مدرس انجليش .. و مع ذلك فضلت أجيب 6.5

أخيرا خدت بعض المحاضرات القصيرة مع م.كريس  مبدأئيا

و أيضا حضرت كورس د.محمد خليل موسي و الكورس كان من ضمنه مكالمتين أسبوعيا مع مقيمين بهدف الممارسة و التعرف ع نقط الضعف

لما بدأت أخد الكورسات بدأت اركز بقي علي نقط مهمة زي ال Linking words  و استخدام ال idioms  و ال complex sentences   و ال filler words  و دي كانت فعلا نقط ضعفي اللي لما خدت بالي منها نطيت من 6.5  ل 7.5 … ملحوظة : الصراحة أني عملت لنفسي ستراكشر كدة في الأجابة عشان أجبر نفسي ع استخدام complex sentences  و idioms  و Linking words  ..  هو عبارة عن استراكشر كدة ينفع يتركب تقريبا مع أي موضوع .. ممكن أشرحهولكم هنا في بوست أخر لو حابين ..

القراءة

ناس كتير بتكرهه مع أنه أحب و أسهل جزء الي قلبي و رغم أنه أقل جزء خد مني مجهود الا كان أنه أكتر واحد بجيب فيه درجات .. الجزء دة عايز واحد بيقرأ سريييييييييع جدااااا .. فكرة مشاهدة أفلام أو فيديوهات كتير سواء ع اليوتيوب أو ع الفيس بال subtitles أعتقد حتفرق معاك في سرعة القراءة جدا .. و أيضا قراءة المقالات الانجليزية من المواقع العالمية .. و أنا شخصيا أرشحلكم تطبيق موبايل اسمه Flipboard   دة بيختارك المقالات طازة  طبقا لأهتماماتك اللي أنت بتدخلهاله ..  تمام كدة سرعت سرعة قرايتك ؟

مهم بقي تبدأ تحل امتحانات حقيقية كل يوم و تراقب الوقت لأن مسموحلك بساعة فقط و دة التحدي بتاع الامتحان دة ..

كل نوع أسئلة و ليه طريقة تعامل معاه ..  في حاجات لازم تقرا القطع الأول .. في حاجات لازم تقرا السؤال الأول .. في حاجات لازم تقرالك سؤالين تلاتة كدة علي بعض و تحاول تدور ع اجابتهم .. أنا شخصيا بعد الممارسة بقيت متعود كل تكنيك معين لكل نوع سؤال ..

الكتابة

دة الكابوس بتاع أي حد عايز يعدي الايلتس و كان كابوسي أنا شخصيا .. مبدأيا كدة الجزء دة أساسه جرامر سليم .. لو مش فاكر قواعد الجرامر بتفاصيلها لازم دي تكون بدايتك و الا حتكون بتضحك ع نفسك .. و الانترنت مليان بكورسات جرامر أشكال و ألوان .. لو معرفتش تسلك خد كورس جرامر مع حد  .. المهم متبدأش من غير جرامر .. لو الجرامر بتاعك كويس خلاص ساعتها حنصحك تخش في الموضوع .. أنا بدايتي كانت بكتب ielts journal  اللي حملتها من ع الموقع دة  book4joy.blogspot

حتلاقي كتاب للتاسك أول و التاني منفصلين و كتاب للأفكار .. مجموعة متميزة جدا أنصح بالبدء بيها و لكن للأسف خليني أقولك أنك مهما ذاكرتها حتفضل تجيب 6.5 و مش حتعلي لأن  Model answers فيها فيها مشاكل كتير لو قلدتها بالضبط صعب أوي تجيب ال 7 .. طب ايه الحل ؟ نصيحتي أبدأ بيها لأن الكتب دي فيها أفكار رائعة و حتمهدك فعلا لأنك تكتب رايتنج كويس … دة اللي أنا عملته بس للأسف فاضل نقطة التدريب و دي للأسف ملهاش حل غير أنك تاخد كورس شامل مع حد يديك الtechniques  بشكل شمولي  شوية عن الكتاب و يصححلك و يقولك ع مشاكلك ..

أنا شخصيا بدأت بالكتب دي و بعدها بدأت أكتب علي أساسها و عملت تصحيح مع أكتر من جهة

كبداية صححت مع خدمة التصحيح في ielts-blog.net   ثم  اشتركت في خدمة التصحيح مع م.كريس   و كلاهما كان كويس في التصحيح .. لكن كان عندي مشكلة لسا في الtechniques   خلتني أفضل واقع في ال 6.5  لحد ما قررت أخد بعض المحاضرات مع م.كريس  و أكتر حاجة فعلا نفعتني هو الكورس اللي لسا مخلصه مع د. محمد خليل موسي  .. و الكورس الأخير الحق يقال كان فيه تفاصيل كتير جدا معظمها كنت عارفها نظريا بس لما كنت أجي أطبقها أفشل  خاصة فكرة ال Grammatical variety  و ازاي تستخدم All types of sentences  زي ال simple/complex/compound/complex compound    و فكرة أنك تنوع في الأزمنة المختلفة في ال essay  و تقوم حاططله واحدModal verb  علي جملة Conditional  علي كام واحدة passive بأزمنة مختلفة .. و فكرة  أنك لازم تقدم دليل أو مثال ع كل فكرة تكتبها لأني كنت بهمل الموضوع دة لما معرفش ادي مثال .. الموضوع دة في الاخر قدرت برده أعمله استراكشر ينفع مع أي موضوع عشان أقدر أوفق كل الليلة دي في مقالة واحدة بسرعة و بدون تفكير كتير في الامتحان ..  أحد الأفكار التانية اللي كانت بتنقصني فكرة أني كنت بخاطر بكتابة كلمات صعبة رغم أني مش متأكد من صحتها أو دقة معناها في السياق و دة من أكبر الأخطاء .. و أيضا تكرار كلمة معينة كتير في الessay خاصة في الparagrap الواحد .. بالنسبة لعدد الأفكار في كل باراجراف فدي أنا شفت فيها أراء كتير تقولك لازم فكرتين و ناس تقولك عادي فكرة واحدة و أنا شخصيا شايف أن فكرة واحدة   كاملة  بشرح و مثال و استنتاج أحسنلك ١٠٠ مرة من أنك تكتب فكرتين ناقصين .. عامة أنا حاولت أخد بالرأي الأحوط و أكتب فكرتين في الفقرة ففشلت جدا في أني أوفق وقت لكدة و قررت أني أستقر في كتابة فكرة واحدة كاملة لكل فقرة بشرحها أو سببها مع مثالها أو دليلها مع استنتاج أو رأيي أن طلب  و دة اللي عملته في الامتحان و جبت ال 7 الحمد لله .. أهم نقطة هنا عايز أأكد عليها هي الأخطاء بتاعة ال Grammer و ال Punctuation  و ال Spelling   ..  لأن غالبا هي دي اللي بتوقع الناس

و طبعا محتاج تكتب كتيييير و يتصححلك كتيييير قبل ما تجيب الدرجة المطلوبة ..

و أخيرا أنا كنت واحد زي ناس كتيييير منكم فاكر أن الايلتس مجرد تجارة و بينقصوا الناس عشان يدخلوا تاني لكن الحقيقة غير كدة خااالص .. طبعا هو في جزء في الموضوع توفيق من ربنا  لا شك لكن خلينا نبقي صرحا : الناس دي بتصحح بمقاييس معينة و عايز شكل معين للمقالة و طريقة معينة للكلام مش مجرد واحد بيتكلم كويس و لا بيعرف يكتب كلام منمق لدرجة أن ال  Natives  نفسهم لو دخلوا الامتحان مش حيقدروا يجيبوا الدرجة لو متدربوش ع ال techniques ..

و اه عايز أقول لزملائي اللي حابين يقدموا في كورسات ايلتس : لازم يكون مستواك في اللغة ع الأقل فوق المتوسط قبل الكورس عشان تستفاد فعلا بال techniques  لأن الشغل بيكون مكثف جدا و حيكون صعب علي حد معندوش خلفية لغوية كويسة أنه يستفاد بالكورس ..

فمحدش ييأس من الموضوع عشان نص هنا أو نص هناك و ربنا يوفقكم و عقبالكم جميعا ان شاء الله