مضحكات الفيسبوك
د. محمد ناصف
اضحك واستغرب وتعجب كماشئت من التالي:
– تجد أحدهم ينشر منشورا يقول مات أبي منذ ساعة والدفنة بعد ساعات لا آراكم الله مكروها ..( إنت إزاي عندك قلب تفتح الفيس وتكتب منشور وابوك بيتغسل ناقص تنشر صورته وهو ميت!!!!). الأغرب إنك تجد العشرات عاملين لايك للمنشور يعني أيه؟ إنت معجب إن أبوه مات؟!!
– أحدهم ينشر منشورا اسألكم الدعاء أصبت في حادث أو درجة حرارتي فوق الخمسين …(وعندك صحة تفتح الفيس وتكتب المنشور ده !!!! ده أنت هراقل بقى!!!!!).. والأغرب برضه هتلاقي ناس عاملين لايك رغم إن الراجل بيسألهم الدعاء مش يعجبوا بمرضه أو بالحادثة!!!
– تجد أحدهم ينشر منشورا ليخبر الجميع ان اسئلة امتحان مادة… معايا واللي عايزاها على الخاص…. ياأخي من أصاب من هذه القاذورات شيئا فليستتر بستر الله.. ورغم ذلك ستجد الآلاف يعجبون بذلك.. حقا البجاحة لها ناسها!!
– واحد مسافر من دولة لدولة أخرى أو من وطنه للغربة أو مسافر لمؤتمر أو ورشة عمل وعايز يعرض تجربته أو انتاجه الأكاديمي أو يتفاخر بذلك ويحدث بنعمة ربه بين أهله وأصدقائه ماشي الحال … لكن واحد بينتقل من كفر المعزة الى عزبة الجدي في زيارة لصديقه ( طب ونعملك أيه يعني؟ ناقص تكتب زيارة رسمية لوفد دبلوماسي من كفر المعزة ….. !!!!)
– تجد من القائمين على التعليم ينشر ما كتب في ورقة اجابة طلاب من ضحك أو استهزاء أو … في نيته إيضاح إلى أين ذهب التعليم في مصر غير مدرك أنه مشارك رئيسي في الكارثة مش سيادتك اللي كنت بتدرسله سواء كان بيحضر أو لأ.. يبقى تداري على خيبتك بقى ولا تظهر إن الطالب مش بيحترمك وإنك لم تؤثر فيه ولم تجذبه لمادتك العلمية!! وحتى لو كان التقصير من الطالب مفيش داعي إنك تنشر ده لأنه الطالب بتاعك وانت مسئول عنه!!!.. الأغرب بقى إن زملائه بيحاولو يساعدوه مطالبين بعدم السكوت وتقديم شكوى للتحقيق.. طيب هو هيقدمها في نفسه كمقصر ولا في الإدارة اللي مطبقتش قانون حضور 75% من العام الدراسي؟؟!!!
– ينشر منشورا يؤكد فيه إن الليلة ليلة القدر ولابد من الصلاة والدعاء والتهجد وبعد دقائق منشور أخر ” مبروك لألمانيا الأسد يمرض ولكن لا يموت ” .. لا حول ولا قوة إلا بالله و فين ليلة القدر يا عمنا.. هي ليلة القدر كانت في bein sport والأغرب إن اللي كانوا بيأمنوا على دعائه من دقائق تجدهم معلقين عليه مش قلتلك ألمانيا هتكسب!!!!